10.10.17

Marea verde na Mostra do Posible

O pasado domingo dia 8 celebrouse dentro da Mostra do posible unha mesa redonda sobre "movementos sociais"


En representación da Marea verde participou Jose Cuenca

7.10.17

Rede galega por unha nova politica educativa



Este é o documento que tomamos como punto de partida para a construcción dunha rede galega por unha nova política educativa:

  1. Principios e finalidades
  • A educación que queremos se fundamenta no principio básico do dereito á educación desde o nacemento e ao longo de toda a vida, así como nos principios de igualdade, laicidade, diversidade, inclusión, sostebilidade, autonomía, convivencia, participación democrática, solidariedade, antiautoritarismo, coeducación. Cunha aprendizaxe cooperativa que sexa participativa, colaborativa e nunca competitiva, implicando na súa consecución a toda a comunidade.
  •  As finalidades da educación que queremos, priorizan a formación intelectual para comprender o mundo no que vivimos e participar na súa mellora; a formación para unha cidadanía responsable, crítica, solidaria e democrática nun mundo pluricultural; o desenvolvemento emocional e a procura do benestar persoal e colectivo da comunidade da que forma parte; a eliminación do sistema patriarcal e o fomento do respecto das múltiples identidades sexuais; a formación para o coñecemento, respecto e implicación na defensa do medio natural do que dependemos; o desenvolvemento da creatividade e da estética e o respecto profundo ás necesidades, aos ritmos e á intimidade das persoas que implica a individualidade de cada nena e neno e a proposta dunha resposta educativa axustada e tamén integral.



  1. A educación como un dereito

    Universalidade do dereito á educación en términos de igualdade e, polo tanto, de gratuidade. A educación pública é a única que pode garantir que o dereito á educación sexa unha realidade asegurando a cohesión social:
  • Oferta suficiente de escolarización pública e gratuíta de 0 a 18 anos que garanta que todo alumno e alumna dispoña dunha praza asegurada no sistema público, de titularidade e xestión pública.
  • Supresión progresiva do financiamento público dos centros privados concertados. Rede única de centros de titularidade e xestión pública que, progresivamente, e de xeito voluntario e negociado, integre os centros privados concertados. Mentres tanto, nin un só concerto máis para a educación privada e supresión inmediata do financiamento a centros que practiquen calquera tipo de discriminación ou non aseguren a gratuidade.
  •  Auditoría da escola privada e pública. Establecer maiores controis sociais e democráticos nos centros educativos e nos procesos de escolarización e esixir máis transparencia no funcionamento e no exercicio profesional da docencia. 


1.10.17

A marea verde na "Mostra do posible"




Organizada polo Rede de Soliedaridade Popular de Vigo vaise celebrar en Cangas a "Mostra do posible "  :  "un encontro de colectivos da economía social e movementos sociais mediante o que se pretende visibilizar as alternativas existentes que permiten construír entre todas un mundo máis xusto. Terá lugar os días 7 e 8 de outubro de 2017."

A marea verde do ensino vai participar  na mesa redonda "A situación dos dereitos sociais en Galicia" a celebrar o domingo dia 8 as 6 h no salón de plenos doConcello de Cangas.

Descargar programa de actividades.

Mais información sobre a "Mostra do posible"


31.8.17

Contra os concertos educativos

As políticas do Partido Popular están a rematar coa educación pública galega. Esta semana temos asistido á publicación oficial dos concertos educativos cos centros privados por parte da Xunta. De novo a lei Wert serve de escusa para que o goberno do Partido Popular continúe a favorecer os intereses das súas entidades parceiras, o que supón unha clara aposta polo desmantelamento do sistema público de educación a prol dos intereses privados. Isto topa de fronte coa nosa concepción do que debe ser educación pública de calidade. Sendo a educación un dereito fundamental de toda a cidadanía, é deber da administración pública protexelo.
Lembremos que a LOMCE é a lei educativa máis polémica das anteriormente aprobadas no Estado español; rexeitada polo alumnado, polo profesorado e polas familias. Dita lei favorece os intereses de centros que segregan ó alumnado por sexo. Precisamente con esta última decisión da Xunta, os cartos públicos, os nosos cartos, irán para cinco centros que segregan por sexo: Montespiño, Peñarredonda, Montecastelo, Las Acacias e Aloya, incrementado o número de unidades en infantil, primaria, ESO e FP.
Máis aínda, catro deles vencellados ao Opus Dei, dato importante xa que financiar a segregación por sexos é totalmente oposto ao obxectivo de camiñar cara unha sociedade baseada en valores de igualdade e libre de prexuízos de xénero.
Dende MVdE consideramos indecente esta decisión da Consellería de Educación que ataca directamente ós principios dunha educación pública laica, gratuíta e libre da segregación por sexos. O PP namentres continúa a facer recortes co peche de unidades de oferta pública, blindando as subvencións a centros privados, e favorecendo unha educación máis propia dos tempos da ditadura franquista. Eses centros teñen asegurados os concertos educativos ata o ano 2023; hipotecando o noso futuro máis aló do que a propia norma indica.
Por todo o exposto esiximos a revisión inmediata destes concertos, xa que supoñen unha competencia directa para o ensino público e non son complementarios del. Chamamos á sociedade galega á movilización na defendensa da EDUCACIÓN DE CALIDADE, INCLUSIVA, LAICA, NON SEXISTA E, MÁIS QUE NADA, PÚBLICA.

23.3.17

Camiño á II Asemblea da Marea Verdo do Ensino

Unha vez que xa está en marcha o chat- foro da Marea Verde do Ensino, como instrumento de  encontro, deliberación, debate e propostas, hai que avanzar no camiño dunha Asemblea xeral galega da Marea, onde poidamos tomar decisións sobre os obxectivos e a folla de ruta a seguir a partir de agora. Os asuntos a tratar na Asemblea, marcados pola actual situación, serían:

- A creación da Rede Galega por unha nova Lei Educativa, a réplica, ampliada cos colectivos galegos, da Rede estatal. Fronte á campaña do pacto educativo do tripartito PP-PSOE- Cidadáns é preciso difundir a proposta que apoiamos e na que participamos que é a de REDES por unha nova lei educativa, da que xa falamos na I Asemblea. O documento de Redes está no noso blog, onde podemos consultalo: mareaverdedoensino.blogspot.com.es

- Actualizar e aprobar a táboa reivindicativa que xa comezamos na I Asemblea. No Blog ademais de publicar a táboa aprobada na I Asemblea, é o espazo para que as persoas dos diferentes colectivos vaian propoñendo as súas propias reivindicacións que nos permita completar unha táboa que se votaría na II Asemblea. Crearemos un espazo chamado Caderno de reclamacións.

- Elaborar un calendario de accións da Marea Verde, polo menos ata final de curso coas características que nos son propias: dende os centros, comarcais, facilidade de preparación e moita visibilidade.

- Elixir novos voceiros, concretando as súas funcións.

- E todos aqueles outros que teñades a ben propoñer antes do 15 de abril.

  • DATA DE CELEBRACIÓN: 22 DE ABRIL
  • LUGAR: COMPOSTELA

En canto confirmemos o espazo concreto prepararemos un cartel para a súa difusión

SÓ QUEDA UN MES PARA A ASEMBLEA: QUE SUBA A MAREA!!!!